2016年4月8日 星期五

禾稈冚珍珠 - 革新會食堂

多謝爐兄攪飯局、也多謝Joyce 老豆的好介紹,新手、Joyce 及 Maggie 美味的好酒及手信、今晚又係一個滿載而歸的心情。





雖然這裡的環境像飯堂多一點、但真係比人有禾稈冚珍珠的感覺。

今晚菜單如下 :
玻璃大蝦球 ~ 來到時真係以為是帶子、這樣大隻、又沒有紅根(真係好花心機的手工菜)、用刀切開時已感覺有彈性、入囗更覺煙韌彈牙。碟旁的蝦籽是另一點睛之作,很久未吃過有質素的蝦籽;這裡的很香很有蝦籽味,彌補了這蝦本身味道較為淡薄之不足。聽爐兄說、還有另一味蝦的菜色、雖然視覺上沒有這個奪目、但蝦味更出、下次可以試試。


碧綠珊瑚 ~ 介蘭嫩夾爽脆、和蟹肉、竹笙一起伴食、又是另一番知味。


骨香鯧魚球 ~ 這味菜一上桌已叫衆人注目,非是為它的外觀而嘩然,而是為那噗鼻而來的香氣/鑊氣所牽引,中菜尤其是粵菜最緊要係鑊氣,但現時做到這點的菜館實在不多,難怪它一進場就令我們驚喜了。香味已先拔頭籌,食味又如何呢?有頭威挭要有尾陣啦 ~ 大大的鯧魚一魚兩食、魚身泡油炒球、魚骨炸脆放底。火候控制得宜,魚肉鮮甜、肉質不會過老,魚骨酥脆有咬口,也是送酒良伴呢!


蝦籽柚皮 ~ 這個造型很可愛呀,小巧圓圓的外觀,遠看很像鮑魚呢。別看它體型細小,卻是頗為有「厚度」的;可能因肉身仍然保留了纖維,咬下去亦有質感(須知現時大多數吃到的都是軟如綿花兼且夾都夾唔起的貨色)。再加上優質的蝦籽,就是美味!!


砵酒蠔 ~ 一般蠔炒完後也會縮水、今次縮完後還有這樣大隻、未縮時有幾大隻、真係可想而知。蠔焗得淋而入味,而且蠔邊更是脆脆的,也是另一必點的菜式。


紅酒燴牛尾 ~ 因信仰而沒有食、但聽其他食友不停讚好吃、真不是味道。


咕嚕肉 ~ 這味菜想起一位舊朋友、豬肉用上梅頭(豬肩)肉、配上青椒、紅椒、洋蔥及新鮮菠蘿一起炒、酸甜汁味道剛好、肉質外脆內軟、食過不停、可惜欠了一碗白飯。


炸子雞 ~ 外皮炸得很脆口、雞肉嫩滑。


糯米飯 ~ 和「順得」一樣、看似楊州炒飯、但一食落便知龍與鳳、糯米味很香、又乾身、粒粒分明?真奇怪是怎樣可以把炒糯米飯炒成這樣,呢啲真係功力。


紅豆沙 ~ 紅豆很香、加上陳皮更好食、味道唔會太甜、正合我的口味。

席後大廚過來談天飲酒、原來今晚對他來説、只是普通菜式,還有很多特別菜未出手、大家立刻起哄、要求擇日重賽。







Name : 革新會食堂

Address : 中環租庇利街10號富興大廈3字樓301室

Tel : 2543 7810